Arion og Meniga tryggja rekstur Stofnunar um fjármálalæsi

Breki Karlsson, forstöðumaður Stofnunar um fjármálalæsi.

Í svari frá Stofnun um fjármálalæsi segir að reksturinn hafi frá upphafi verið rekinn með sjálfsaflarfé, en væri ekki mögulegur nema fyrir tilstilli stærstu styrktaraðila stofnunarinnar, sem eru Arion banki og Meniga. Frá árinu 2009, hefur Stofnunin um fjármálalæsi nokkrum sinnum fengið styrki úr opinberum sjóðum, en þeir styrkir hafa verið verkefnabundnir og því ekki fyrir reksturinn sem slíkan. Þessir verkefnastyrkir hafa alls numið 2,1 milljón króna.

Lesandi spyr:

Hvernig er starfsemi stofnunarinnar kostuð? Hverjir kosta starfsemina? Hvert hefur verið framlag út opinberum sjóðum til starfseminnar frá því hún var sett á laggirnar (sundurliðað eftir árum, ef við á)?

Forstöðumaður Stofnunar um fjármálalæsi er Breki Karlsson, sem svaraði fyrirspurninni: 

Stofnun um fjármálalæsi hefur starfað frá árinu 2005, þegar Breki Karlsson gerði fyrst rannsókn á fjármálalæsi framhaldsskólanema. Frá upphafi hafa helstu viðfangsefni stofnunarinnar verið rannsóknir á fjármálalæsi, gerð námsefnis og vitundarvakning um mikilvægi fjármálalæsis.

 

Meðal rannsókna eru rannsóknir á fjármálalæsi Íslendinga árin 2008, 2011 og 2014. Meðal námsefnis sem stofnunin hefur staðið að eru bækurnar „Ferð til fjár“ sem kom út 2010 og „Auður - Hagfræði fyrir íslenska þjóð“ frá árinu 2013. Þá hefur stofnunin staðið að gerð sjónvarpsþátta í samstarfi við Sagafilm, staðið að alþjóðlegum fjármálalæsisvikum og fengið einn helsta sérfræðing OECD í fjármálalæsi til landsins til að kynna bestu leiðir sem hafa gefist í heiminum við eflingu fjármálalæsis.

 

Þá hefur stofnunin starfað með náið með International Network for Financial Education, OECD, World Bank, sem og Child and Youth Finance International að ýmsum verkefnum, meðal annars rannsóknum og kennslu í fjármálalæsi víða um heim.

 

Stofnun um fjármálalæsi hefur frá upphafi verið kostuð af sjálfsaflafé, en gæti ekki starfað nema fyrir veglegan stuðning helstu styrktaraðila sinna, Meniga og Arion banka. Stofnunin hefur ekki þegið neina styrki úr opinberum sjóðum til reglulegrar starfsemi sinnar, en hefur nokkrum sinnum frá árinu 2009 hlotið verkefnabundna styrki til námsefnisgerðar og rannsókna. Eftirfarandi eru styrkir úr opinberum sjóðum sem Stofnun um fjármálalæsi hefur hlotið:

 

2012: Nýsköpunarmiðstöð: Átak til atvinnusköpunar 500.000

2013: Endurmenntunarsjóður grunnskóla 100.000

2013: Þróunarsjóður námsgagna, Aflatún 1.500.000