Íbúar geta látið stjórn húsfélags víkja ef ástæða er til

Íbúar geta látið stjórn húsfélags víkja ef ástæða er til

Það eiga engin leyndarmál að vera í húsfélögum og þar hafa allir íbúðaeigendur rétt á að fá að sjá öll þau gögn sem snúa að húsfélaginu. Ef stjórn húsfélags sinnir ekki lögboðnu hlutverki sínu til að halda aðalfund og skila ársreikningum, er lokaúrræði íbúðaeigenda að boða sjálfir til fundar og skipa nýja stjórn. Spyr.is fékk svar frá Húseigendafélaginu vegna fyrirspurnar frá lesanda um hvað væri hægt að gera, ef húsfélag legði ekki fram ársreikninga né stæði fyrir aðalfundi.

Lesandi spyr:

Hvert getur fólk leitað ef húsfélag trassar að halda löglegan árlegan aðalfund og skila ársreikningi?

Spyr.is sendi þessa fyrirspurn til Húseigendafélagsins og fyrir þeirra hönd svaraði Helga Þórhallsdóttir, lögfræðingur.

Helga:

Aðalfund húsfélags á samkvæmt lögum að halda ár hvert fyrir lok aprílmánaðar, og eitt af lögbundnum verkefnum aðalfundar er framlagning ársreikninga til samþykktar og umræður um þá. Stjórn húsfélags ber ábyrgð á að boða til aðalfundarins og útbúa og leggja fram ársreikninga.

 

Sinni stjórnin ekki þessu hlutverki sínu á fyrstu fjórum mánuðum ársins er eiganda rétt að byrja á því að skora skriflega á stjórnina að boða til aðalfundarins og leggja ársreikningana fram svo fljótt sem verða má, og jafnvel innan nánar tiltekins frests. 

 

Dugi það ekki til getur eigandinn, eftir atvikum í félagi við aðra eigendur í húsinu, boðað til fundarins sjálfur að frestinum liðnum. Er þá rétt að taka það fram í áskorun á stjórnina að sú leið verði farin.

 

Við þessar aðstæður er rétt að hafa í huga að í húsfélögum eiga engin leyndarmál að vera og allar upplýsingar sem varða rekstur félagsins og bókhald eiga að vera eigendum aðgengilegar. Öllum eigendum er tryggður í lögum réttur til þess að skoða bækur félagsins, reikninga og fylgiskjöl með hæfilegum fyrirvara en þó jafnan að viðstöddum stjórnarmanni.

 

Þrátt fyrir að framangreindar skyldur séu lagðar á stjórn húsfélaga gefur það augaleið að stjórnarmenn verða ekki þvingaðir til þess að útbúa ársreikninga, geri þeir það ekki að eigin frumkvæði eða í kjölfar áskorunar þar að lútandi.

 

Lokaúrræði eiganda, þegar stjórn hefur ekki sinnt áskorunum um að boða fund og leggja fram ársreikninga, er að boða sjálfur til fundarins, sbr. framangreint, kjósa nýja stjórn og fela henni að útbúa ársreikningana.

 

Að lokum skal leggja ársreikningana fram á framhaldsaðalfundi, sem æskilegt er að halda við fyrsta tækifæri.

Er svarið þitt rætt í sjónvarpinu? Fylgstu með Spyrþættinum ,,Ég bara spyr" á Hringbraut á miðvikudagskvöldum kl.21.30 og kl.23.30. Þátturinn er endursýndur á Hringbraut um helgar.  

Fyrst birt 15.10.2014