67 ára en engin gleraugu?

67 ára en engin gleraugu?

Spyr.is fékk skemmtilega fyrirspurn frá 67 ára gömlum lesanda sem spurði hvers vegna hann þyrfti ekki að nota gleraugu við lestur, eins og flestir á hans aldri. Jóhannes Kári Kristinsson augnlæknir hjá Augljós, svaraði þessari fyrirspurn. Hann sagði að mjög líklega væri skýringin sú að viðkomandi væri einn af þeim örfáu sem er með það sem kalla má ,,náttúrulega skiptisjón,” þ.e. viðkomandi er nærsýnn á öðru auganu en með venjulega sjón á hinu. Í svarinu bendir Jóhannes Kári á skemmtilega leið til að sannreyna þetta.

Lesandi spyr:

Ég er 67ára gamall. Afhverju þarf ég ekki ennþá að nota gleraugu orðinn þetta gamall. Ég les allt gleraugnalaust. Það eru allir aðrir sem eru farnir að nota gleraugu nema ég. Ég er náttúrulega ánægður með það en er líka mjög hissa. ef augnlæknir vill skoða mig þá er það alveg sjálfsagt.                                           ​

Jóhannes Kári:

 Þú ert líklega einn af þeim örfáu sem er með það sem kalla má „náttúrulega skiptisjón“, þ.e. þú ert mjög líklega nærsýnn á öðru auganu, en „venjulegur“ á hinu. Þetta geturðu prófað á eftirfarandi hátt: Horfðu á hlut langt í burtu og settu lófann fyrir vinstra augað. Skiptu síðan um auga og horfðu á hlutinn með vinstra auganu. Það má reikna með að þú sjáir hlutinn miklu betur með öðru auganu. Horfðu nú á letur í bók og gerðu það sama, þ.e. setja lófann fyrir sitt hvort augað. Líklegast sérðu betur nálægt þér með því auga sem sér verr frá sér og öfugt. Þetta er kallað skiptisjón og er sjaldgæft en afar hentugt fyrir þann sem hana ber. Við gerum augun svona úr garði þegar við framkvæmum laseraðgerð, þ.e. að gera annað augað nærsýnt til að viðkomandi sé minna eða ekki háður lesgleraugum eftir laseraðgerðina.