Hvers vegna má ekki leggja á malarplani við Leifsstöð?

Hvers vegna má ekki leggja á malarplani við Leifsstöð?

Lesandi velti því fyrir sér, hvers vegna það væri ekki hægt að nýta til dæmis bílaplanið á gamla Varnarsvæðinu, til að leggja bifreiðum gjaldfrjálst við Leifstöð. Í svari frá upplýsingafulltrúa Isavia, rekstraraðila bílastæða við Leifstöð, segir að hægt sé að leggja á gamla varnarsvæðinu, en það bílastæði sé 5-6 kílómetrum frá flugstöðinni og því langt að fara. Þá segir að umframtekjur sem skapast af gjaldi bílastæða, séu nýttar til að standa undir kostnaði við að fjölga bílastæðum.

Lesandi spyr:

Hvers vegna er ekki boðið upp á gjaldfrjálst malarplan til að leggja bílum á einhversstaðar í nágrenni Leifsstöðvar? Er ekkert bílaplan á gamla Varnarsvæðinu þar sem hægt er að leggja bílum gjaldfrjálst? Afhverju kostar að leggja við Leifsstöð en ekki við Hallgrímskirkju þar sem ekkert er plássið?

 Spyr.is sendi fyrirspurnina til Isavia og fyrir þeirra hönd svaraði Guðni Sigurðsson, upplýsingafulltrúi.

Guðni:

Gjaldskráin á bílastæðum við Keflavíkurflugvöll miðast við þjónustustig. Tekjur sem verða af bílastæðunum umfram rekstrarkostnað eru notaðar til þess að standa straum af kostnaðarsömum framkvæmdum við fjölgun bílastæða. Fjölgunin er orðin nauðsynleg vegna farþegafjölgunar en nýtingarhlutfall er mjög hátt á þeim stæðum sem nú eru til staðar.

 

Þjónustan sem við viljum bjóða upp á á bílastæðunum við flugvöllinn eru afgirt og vöktuð bílastæði með eftirlitsmyndavélum, en það teljum við mjög mikilvægt þegar um er að ræða bílastæði þar sem fólk leggur í lengri tíma. Slík þjónusta kostar og við höfum haft það markmið að láta þjónustuna borga sig upp sjálfa með því að taka gjöld fyrir hana. Það að bjóða upp á eftirlitslaust malarplan hefur því ekki komið til tals hjá okkur, þar sem við viljum halda ákveðnu þjónustustigi.

 

Á gamla varnarsvæðinu eru bílastæði sem er hægt að leggja á, svæðið er hins vegar 5-6 kílómetra frá flugstöðinni. Þaðan þyrfti fólk koma sér þaðan til flugstöðvarinnar. Við bendum farþegum á að mjög góðar rútusamgöngur eru frá höfuðborgarsvæðinu til Keflavíkurflugvallar. Þær eru umhverfisvænn ferðamáti og eru rútuferðir fyrir og eftir öll flug.