Fasteignasalinn skaut undan greiðslu: Hvað er til ráða?

Fasteignasalinn skaut undan greiðslu: Hvað er til ráða?

Það eru svartir sauðir í hverri starfsgrein, sagði Guðbergur Guðbergsson, sem svaraði fyrirspurn frá lesanda í þættinum Afsal sem sýndur var á Hringbraut þann 4.febrúar sl. Þar var borin upp spurning frá lesanda, sem sagðist hafa lent í því að fasteignasali skaut undan greiðslu. Guðbergur sagði mikilvægt að fólk greiddi aldrei greiðslur fyrir fasteignaviðskipti, inn á persónulega reikninga fasteignasala. Hann sagði þó að ef mál kemur upp, þar sem fasteignasali hefur dregið að sér fé, þá gildi það sama um slík mál og önnur sambærileg: Þetta væri þjófnaður sem bæri að kæra til lögreglu. 

Lesandi spyr:

Ég hef lent í mjög slæmum málum er varðar sölumenn á fasteignasölu, sem skaut undan innborgun sem ég greiddi og þurfti þ.a.l. að leita til Félag fasteignasala til þess að fá aðstoð.

Ég er ekki sú eina sem hef lent í þessu, því ég hef heyrt fleiri dæmi um sölumenn sem hafa vísvitandi svindlað á fólki. Því er fullur skilningur á því að lögin (um sölu skipa og fasteigna) sem sett voru fyrr á þessu ári eru gerð til þess að vernda okkur fyrir þeim skaða sem getur hlotist af þeim viðskiptum sem fólk á við fasteignasölur, enda almennt um aleigu fólks að ræða.

Af hverju eiga sölumenn ekki að hafa nauðsynlega kunnáttu til þess að höndla nánast með aleigu fólks? Eru fasteignasalar bundnir siðareglum í störfum sínum?