Draumráðning: Illgresi

Sæl Hrönn og takk fyrir fyrri ráðninar sem margar hverjar hafa algjörlega passað. Það er mjög langt síðan mig dreymdi eitthvað seinast (svo ég muni) en núna dreymdi mig að ég væri á kunnuglegum slóðum. Ég var stödd við hús sem ég bjó í forðum (leið ekki vel þar og hef skrifað um það varðandi fyrri drauma). Maðurinn minn núverandi var að saga fyrir utan húsið og við vorum greinilega að laga það til að innan. Ég var út við götu (innkeyrslu) og ætlaði mér að reyta illgresi og hreinsa til. Ég byrjaði á einhverju beði en þegar ég lyfti illgresinu upp þá kom bara allur „flöturinn“, það var eins og moldin í beðinu væri bara 2cm lag af þéttu illgresi og ekkert þar undir (nema kannski e.h. dúkur). Þannig að ég sá að það þýddi ekki að taka þetta í burtu því þá yrði ekkert eftir. Ég fór að setja þetta aftur á sinn stað. Á meðan ég er að þessu, kemur ungur maður, dökkhærður og fer að tala við mig. Hann var vingjarnlega og kátur. Þá opnast dyrnar á efri hæðinni (þetta var 2ja íbúða hús) og konan sem þar bjó kemur í dyragættina og kíkir rétt út. Dökkhærði maðurinn var sonur hennar í draumnum. Þetta var sama konan og bjó uppi í raunveruleikanum, sú kona var frekar erfið í samskiptum. Ég er allt í einu stödd inni í íbúðinni og vinur okkar hjónanna er kominn í heimsókn og er að fá sér að borða. Hann er mjög ánægður með endurbæturnar á íbúðinni. Þessi maður býr erlendis (í raunverul.) og það er stutt síðan hann var í heimsókn hjá okkur en hugsanlega er konan hans eitthvað ósátt við manninn minn eða okkur vegna einhvers sem við vitum ekki … Mér fannst eins og við hefðum tekið herbergi sem bara kettir hefðu verið í, og gert það nothæft til að búa í. Þetta er svona frekar ruglingslegt en vonandi sérðu eitthvað :) A.m.k. leið mér ágætlega í draumnum.